الحلقة 1 : فقت فالصباح قلت نكتب ليكوم على قصتي مع الحجر …

11 مايو 2020 - 11:33 م

ترددت كثيرا قبل أن أكتب هذه الخواطر اليومية … لكنني كتبتها و إنتهى لا تسأل من أكون فربما أنا صورة مشابهة أو مشوهة عنك !

خمسطاعش يوم مخرجت الملل … ساكن مع جوج صحابي شداتنا الوقت فهاد الحجر فالدار كاريين انا واقف من الخدمة وخونا لي خدام عندو باغي يفرق القفة وهو بنادم خدام معاه مكيخلصوش ههه … مهم نهار قالو لينا متخرجو الا للضرورة مكنخرجش حتى كنتحنسر فالماكلة ، كنخرج نتقدا ونرجع …اليوم لثنين خرجت من بعد 15 يوم ديال الملل و ديك الاعصاب ديال الكونيكسيون (تحية ل 20.22 )والناموسية و الشعر ديال ناس الغيوان واخا متنكسابش صوتهم ، لقيت راسي حمار طموح ايسحاب لي بالزيادة ديال الحالات بنادم ايدخل لدارهم …ساعة بحال الا تنخوي الماء فالرملة حيتاش وقتما خرجت تنلقى العيالات تيتخيرو فبطاطا وخيزو والخيار …والدراري تيلعبو مع السلطة …بلاتي نعاود ليكوم واحد البلان ههه ، كنت دايز ولقيت واحد الشارف بلحيتو خارجة من الكمامة ديال سطاعشريال وباينة عمرها تبدلات متسولونيش علاش مهم واقف حسكة مع داك التقصير والطاغية الإيماااان مهم معليناش راد البال مع مول البنان باش الا جات القائدة يعلموا يتخبى ويدي الأجر …زدت لقدام فالزنقة الكبيرة ديال لقصبة لقيت الطبقة لي تتكالي الحيط مجموعة كي العادة جنب الحيط وتيعاودو بالغوات كيفاش قولبو المقدم …تقديت وتقاضيت مع هاد الأنواع لي شفت ، رجعت للدار غسلت يدي بالما و الصابون كثر من دقيقة ..حطيت لعيبات يتغسلو، تلاحيت فبلاصتي لي وحلات فبلاصتها وبقيت تنفكر وايلي واش زعما المغاربة رجعو خفاف …و نسوا بلي خونا لي كلا الخفاش وصلو حتى لمعرفت اش (الوباء)…وانا نبغي نتمزك لديسك “هادا هو بنادم ” لحيمي …ولكن ديك لكونيكسيون طيارة دوزات الديسك دغيا سمعتو غي جوج ثواني وهو يوقف …اوف على سخونية فالبيت مع البني قديم ..نضت حليت الشرجم يضرب الهواء هادشي غي مورا الفطور …وانا نسمع الرجلين تيجريو فالزنقة والصوت ديال البعالك “دازو دازو صافي نرجعو” …عقلية بزق وطلق …

اليوم وصلنا 200 غذا معرفتش شحال انوصلو …بزاف دالناس ملتازمين ولكن الحوتة تتخنز الشواري ….

غذا الا بقيت حي نعاود ليكوم حوايج اخرين …باي تهالاو اخوتي لي باقين فالدار .

بقلم : هو في الحجر …

اترك تعليقاً

لن يتم نشر عنوان بريدك الإلكتروني.

هذا الموقع يستخدم Akismet للحدّ من التعليقات المزعجة والغير مرغوبة. تعرّف على كيفية معالجة بيانات تعليقك.

%d مدونون معجبون بهذه: